Presse

Noreg på det vakraste, UT.no

Gourmetmat frå Solund, Firda

Flunkande ny lokalbåt, Firda 

Forelska seg og flytta bedrift, Firda

Dronning Sonja i Solund


Sogn turlag på Kajakktur i Solund, reportasje fra Sogn turlag

Solund- vakrast i verda! 07.09.10  Marino J. Ask

Solund- vakrast i verda!
-  var mine ord etter  ei kajakkoppleving  av dei sjeldne i 2008. Den august- helga gjekk turen til Storsundet nord av Hjønnevåg, ytst i Ytre Sula. Overskrifta kan eg like gjerne nytte om att.

Øyriket lengst vest i Norge er ein fryd å skue i det vi ser Sognesjøen blenkje i kveldssola. Krakhellenipa, Ulvegreina og langt ut i sørvest Tungodden. Målet i kveld er Råkeneset DNT- hytte. Godt gøymt mellom knausar og lyng ligg hytta i Råkesundet nord om Hardbakke.  Vi padlar stille ut Råkepollen, rundar neset og sig inn i  Solvika. Skinet frå ei raud- gul kveldssol speglar seg i vindauga på den 250 år gamle stova.  

Laurdag morgon  er det eit sørleg  vinddrag. Det gjev fin bør nordover Råkesundet. Vi sig mellom holmar og rabbar med utsikt til  fjellområdet Fonnaheia i aust. Frå  Pollen sør i  Solund er det ein fin tur  opp til Pollatinden, og vidare nordover Fonnaheia mot Drengenes.  Hytta  på Råkeneset ligg midt i dette flotte fjell- og fjordlandskapet.  Jamne åretak dreg oss  nord og ut i Lågøyfjorden. Hurtigruta sig langsamt mot Ytre Steinsund  i det vi kjenner  hav- dønningane løftar oss varsamt opp og ned.  Nokre av skjæra innbyr til kajakk- moro.  ”Bølgjekreftene” arbeider under oss. Opp etter taren, varsamt ned att. So med eit kjem den ”sjuande” båra, litt større ein dei førre.  Større krefter, sjøen fossar opp mot berget.

Humøret er  det lite å sei på, når vi gjer strandhogg på Drengenes.

I det vi sig ut Lågøyfjorden kjem solgangsbrisen. Lett medstraums ber det nordover mot Tverangsskjer. Vi rundar  seglingsmerket og legg kursen mot  Lågøy. Vind og tidevatn beint i mot gjev heller dårleg bør. Ei  fin ”uthamn” med utsikt til storhavet er høveleg stopp før vi kursar mot Råke. Ein leiken oter  kjem opp av vatnet berre meter frå oss. 

Etter ein laurdagstur på heile 25 km er naturleg nok turmålet dagen etter  tema ved middagsbordet.

Morgonlyset  sundag gjev bod om ein dag av dei sjeldne. Ei kryssing nordvest til Gåsvær er kanskje innan rekkevidde, sjølv om turen vil gå i heilt ope hav.  Mellom lyngkledde knausar  sig vi tidleg vestover mot Færøy og sørspissen av Lågøy.  Etter ei rask rådslaging vert vi samde om å legge kurs  mot  Gåsvær. Vi skimtar seglingsmerke nord av Oddekalven forsvinn bak oss når vi møter storhavet.   

Lyset, landskapet  og  havet som funklar i sola.  Utsikt og opplevinga er verkeleg av det sjeldne. Alden, Bulandet, Blegja  (1305 moh) og Storehesten. Lihesten, Atløyna og Batalden langt der nord.

Varsamt glir vi over nokre fluer i det Gåsvær ”veks” i storleik. Havblikk mest heilt til Utvær. Nokre seglingsmerke  undervegs fortel at her er vegen til trygg hamn. Det treng vi knapt tenkje på i dag. Lunsj nyt vi i solsteiken vel inne i  den idylliske hamna på Gåsvær. Turen attende mot hovud- øyane openbêr Solund- landskapet i all sin velde. Høgfjell  som strekkjer seg  over 500 høgdemeter her vest i  havet.  Hågøy, Steinsundøy og Pollatinden. Lågøystolane og vene Færøy med sin katedral.  Turen går innom  Litle Færøy før  Råke kjem til syne under  Pollatinden  sin steile vestvegg